ខេត្តបាត់ដំបង៖ កាលពីព្រឹកថ្ងៃទី ២៦ ខែ ឧសភា ឆ្នាំ២០១៥ ឯកឧត្តម ច័ន្ទសុផល អភិបាលនៃគណៈអភិបាលខេត្តបាត់ដំបង បានទទួលជួបសម្តែងការគួរសម និងជូបពិភាក្សាការងារជាមួយឯកឧត្តម ខាល់ វើត ឯកអគ្គរដ្ឋទូតប្រទេសកាណាដា ។ ក្នុងនោះក៏មានការចូលរួមពី ឯកឧត្តម ជាម ច័ន្ទសោភ័ណ អភិបាលរងនៃគណៈអភិបាលខេត្តបាត់ដំបង លោកប្រធានមន្ទីរ បរិស្ថានខេត្ត លោកនាយខណ្ឌរដ្ឋបាលព្រៃឈើបាត់ដំបង និង មន្ត្រីជំនាញសាលាខេត្តបាត់ដំបងផងដែរ ។
នៅក្នុងកិច្ចប្រជុំ ឯកឧត្តម អភិបាលនៃគណៈអភិបាលខេត្ត បានស្វាគមន៍ និងថ្លែងអំណរគុណចំពោះឯកឧត្តម ឯកអគ្គរដ្ឋទូតប្រទេសកាណាដាដែលបានជូបពិភាក្សាការងារនឹងសហការគាំទ្រកិច្ចការងារការពារ និងអភិរក្សបរិស្ថាន ធម្មជាតិ ជីវៈចម្រុះនៅក្នុងខេត្តបាត់ដំបងជាពិសេសតំបន់ប្រើប្រាស់ច្រើនយ៉ាងសំឡូត ។ ឯកឧត្តមបានមានប្រសាសន៍
ទៀតថា ដោយមានការយកចិត្តទុកដាក់ពីសំណាក់ថ្នាក់ដឹកនាំ ដែលមាន សម្តេចអគ្គមហាសេនបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ខេត្តបាត់ដំបងបានយកចិត្តទុកដាក់ខ្ពស់ទៅលើកិច្ចការងារការពារ និងអភិរក្សបរិស្ថាន និង ធនធានធម្មជាតិ ។ ឯកឧត្តម ជាម ច័ន្ទសោភ័ណ បានធ្វើការសំណូមពរដល់ ឯកឧត្តមឯកអគ្គរដ្ឋទូតប្រទេសកាណាដា សុំឲ្យមានការសហការ និងជួយគាំទ្រនៅក្នុងគម្រោងការពារ និងអភិរក្សបរិស្ថាន និងធនធានធម្មជាតិ ជាបន្តទៀត ។
ឯកឧត្តមឯកអគ្គរដ្ឋទូតប្រទេសកាណាដាបានមានប្រសាសន៍ថា នេះជាលើកដំបូងដែល ឯកឧត្តមបានមកដល់ ខេត្តបាត់ដំបង ហើយខេត្តបាត់ដំបងមានបរិស្ថានល្អ នឹងគូរឲ្យចង់រស់នៅ ។ ហើយឯកឧត្តម នឹងជួយជម្រុញដល់វិនិយោគិន នៃប្រទេសកាណាដាឲ្យមកវិនិយោគនៅប្រទេសកម្ពុជា ជាពិសេសខេត្តបាត់ដំបង ។
